بقلم // إياد الإمارة
| هسة مو وقت “كيك” |
عمي دير بالكم الشعب بحسرة الخبز فمو وقت “كيك”..
وخاف تالي حتى خبز يابس ماكو، ونرجع لسالفة كيلو الطحين الغالي والي بالي بالي.
أكو واحد “مسطول” دخل للسوگ أيام التسعينات سأل: بيش كليو الطحين؟
گلولة: بألفين دينار!
گال: ما لازم طحين. نرجع ناكل خبز وچاي!
| حكومة السيد عادل فاشلة |
فاشلة جداً بخويطها..
لا إتفاقية صينية ولا طريق حرير ولا طريق صوف..
دير بالكم “تدورون” فشلها على الناس من جديد.
ولا ابو فلان ولا ابو علان ولا جهاد ولا ابو جهاد.
| طلعوهم تقاعد لأن فقدوا العدالة والأهلية |
اكو شيخ عشيرة يفتهم چان إذا شاف واحد يخربط بالحچي لو بالتصرفات يشد اديه ورجليه بحبل ويعزله يم “الحلال”..
تعرفون شنو “الحلال”؟
هسة ما نريد منكم هيچ، بس أكو چم واحد بيناتكم كبر وتعب ومريض وصار سنين نطلع من حفرة ويدخلنا بوحدة أعمق منها!
گلولة عمي تكتر وين راح تودي هاي الناس؟
| التغيير سُنة.. |
التغيير سنة وشيعة ومحد راح يلحگ يحطها برگبة عالم ويطلع منها سالم..
فعلاً التغيير سنة..
وإن الله يستبدل الذين لم يُحسنوا مع الناس..
المهم برضاكم أو بدون رضاكم سيشملكم “الگص” ولات حين مناص.
