عزيزي سائق السيارة في شوارع العراق..!

بقلم // الشيخ حسن النحوي 

نصيحة
من يزاحمك أحد لأي سبب كان افسحله المجال سواء چان بطران لو مستعجل
من يطخ سيارتك أحد إنزل وإنت مبتسم وجرّب تگله حمد الله على السلامة وراها سولف باللي تريده

من تدعم أحد أول شي گُلَّه السيارة وصاحبها بخدمتك، توقع دائما الطرف الثاني متوتر أو مدمن أو مصاب بنكسة كبيرة،

توقع دائما أن الطرف الثاني شايل سلاح متهور ماعنده ضوابط وممكن مخمور،

أي أحد تواجهه بالطريق هذا مو عدو ولا يعرفك فحاول تخلص الأزمة وإدفعها بگصبه لأن شلون ما تصير المشكلة إنت ماراح تربح بيها ويه طرف ما يستحي مثلا،

السيارة مجرد حديدة تروح وتجي بس إذا بسبب مشكلة الحادث تفقد حياتك أو تركتب جريمة قتل فتأكد رح تتمنى أنه لو منطي سيارتك كلها بدون هاي الحادثة اللي غيرت مسار حياتك،

دائما صير إنت الأعقل والأنبل و فكر ترجع لبيتك وأطفالك مبتسم، ماكو شي يسوه صدكني .

الله يحفظكم ويرعاكم من كل شر و مكروه